على نايك بكت في داخلي عين الفقر و الجوع

و قام الجرح بضماده ينازع باقي احساسي

يمزّقني على شأنك أمل عشته معك مشروع

و صوتك و الصدى و الجرح بين خطوط كرّاسي

نسيت أترك مساحه للخيانه و العنا المجموع

و رحت أهدي لك العقدين من تاريخي الماسي

حسبت إنّك هنا تزرع حواليني صغار شموع

و تطفي وحشة العمر الكئيب و وقتي القاسي

عرفتك نوع لا يعلى عليه و صرت أسوأ نوع

عجزت أطوّعك و صعبت في الآخر على مراسي

من اللي علّمك بعد الغرام تخون في أسبوع

و تعطي من رصيد الزيف في قلبك لجلاّسي

إذا رحت أذكر إنّك خنتني أو عشت لك مخدوع

تقسّمني مساحات الندم من رجلي لراسي

كرهتك يا / الخطا / يا / موسم الأوجاع / يا / الدلّوع

و بعتك للقليل اللي بقى في خزنة إفلاسي

هوى تمثالك اللي كان عـ رف الهوى مرفوع

و شق الريح بالعاني شراعك لي بطى راسي

معك شح الحصاد و لا بقي زرّاع للمزروع

و تذبح عبرتي الذكرى و لا يوصل لها كأسي